洋蔥燒汁豬柳 & 清蒸桂花 + 薑蔥炒C肥蟹

哈哈~ 呢餐係復活節假期最last個日煮既...........................

呢日係舊曆三月廿三 即係"天后誕" 其實呢............................

笨笨自從搬左入元朗之後 就超怕呢一日 因為1/2個元朗市既路

都會全部封晒 ................. 由朝早7點幾 至 下午3點幾

天后誕呢一日 如果想出元朗 基本上除左行路 係冇其他方法架啦

今年都仲好d 剛剛係假期 如果要返工就真係好麻煩

記得笨笨試過幾年 要同公司講 呢日可能會遲到 .............

試過有一年 係星期六 放半日 結果呢..............我係要行路行45分鐘

返屋企 (暈@@~) 所以今年既呢一日 我一定唔會係4點前出門口 >.<

lunch係屋企左搵右搵 係咁摷 就炒左呢個飯做我同"人家大少"既午餐

屋企冇菜 不過唔緊要 有包什豆看門口 加埋緊餘既蔥 炒個時再加左

d馬拉盞 好香呀~

五點 出門口去買餸 不過都仲好塞車呀 >_<

"洋蔥燒汁豬柳"

呢個豬柳係之前幾日醃左 準備帶飯用架啦 個汁用左日本料理酒+

日式燒汁 唔錯唔錯 因為呢餐冇菜 成個洋蔥放落去整 當菜食 wkaakkaa

"清蒸桂花魚"

好想食新鮮魚 好似好耐冇食 不過呢日街市好多都早收呀

可能係好多檔主都係新界原居民啦 變左呢一日 好多都唔開/收早

去慶祝天后誕......................... 所以睇岩價錢 就求其啦 呢條魚23蚊

"薑蔥炒死肥蟹"

wakakaka~ 查實冇諗過食蟹架 只係行過見到 35蚊一隻............

計下條數 買2隻 都要70 拳頭咁大乍 笨笨呢d孤寒婆 點捨得丫.....

係街市魚檔遊左兩個圈 見有人係到揀蟹 我又八八掛睇下............

突然間 見海鮮檔亞姐係到執執執(搵死蟹) 跟住揀蟹果個就比錢

我都諗住走啦....... 點知亞姐收完錢之後 細細聲問我 20蚊 你要唔要....

我望下 ...... 有4隻啵 20蚊? 呆一下咁望下亞姐 ............................

亞姐: 超抵價比你架 點呀 要唔要

笨   : 佢地香左好耐啦 腳都甩埋

亞姐: 信我一次 20蚊jar 包你話抵食 仲有呀 唔係香左好耐架乍

笨    :  好啦 20蚊 殺你....................

亞姐:  (一路入袋一路講)...... 好似免強你要咁 食完好食既 唔好返黎

          搵我話要再買呀

笨    : 有冇咁誇呀

大家點睇 @@~

 

比錢個時 我仲係到諗 算啦~ 咁鬼耐冇食過蟹 就算比佢老點 都係20蚊

點知............返屋企劏開個時 真係"嘩"左一聲 幾鬼多膏呀

我同"人家大少"講 呢到買左20蚊 佢都唔信呀...............................

靚就係靚啦 真係頂角膏添 不過點都係"甩腳蟹" 冇期望啦...........

真係唔好講笑 自己都唔信呀 超好味呀 真係有蟹既鮮味 而且d

肉一d都唔"梅" 唔係自己親自去買 都唔信係"C蟹"呀~

"人家大少"仲話 係唔係亞姐傻左呀 20蚊賣比你.......................

笨: 車......... 慘得過亞姐可憐我呢個窮困既"小妹妹"呀

人: 妖................ 你唔知醜架