笨啦啦窩居: 7月 2012

2012年7月26日星期四

蟲草花雲耳蒸雞 + 馬拉盞炒通菜 & 猴頭菇紅蘿蔔白背木耳豬展湯

真係估佢唔到 [韋森特] 仲勁過 [李氏力場] (surprise)

居然上到十號 O.........................OMG~ 係3號仔個時見佢既走勢

成個"量角器" 而且行得咁慢諗住實打唔成點知... 攪到上LEVEL10

我國大城市"北京" 攪到水浸仲要有人命真係得人驚呀~

京城呢個"皇宮"都攪成咁真係好擔心其他"平民地區"變成點囉.....

今日睇報紙"京城皇榜救救國家/京城人民" 老老實實如果笨笨真係有咁既能力

我就一定捐.............不過呢..........要親自去個樹派比人民囉

如果唔係...................................(我點知D錢夠竟係去左嫖睹飲蕩定係 "黑$") (cool)

"蟲草花雲耳蒸雞"
金針就用得多呢次用下蟲草花先笨笨覺得好食過金針咬口好D 其實兩樣都係有益既
睇下大家鐘意邊樣啦~ 半隻雞都係係"永達"買不過呢.......... 因為收工去買細雞比人買
晒咁就唯有買全雞一隻多謝60銀兩丫呢樹用左半隻即係30銀兩加埋D配料我估....
35銀兩左右啦 *O*

" 馬拉盞炒通菜 "

屋企倉底仲有D"自家馬拉盞" 通菜又靚當然啦...時令菜麻而且係我至愛既幼通菜當然啦
之前整馬拉盞個時放唔夠"辣椒" 下次再整真係要重手D先 ~O~

天氣點樣都要飲湯呀由其係女人呢~ "猴頭菇紅蘿蔔白背木耳豬展湯"
呢個湯可以降下血壓架不過就唔好加肉效果會更佳 (tongue)

唔加肉仲可
以去血脂呢~ 記住要加埋"南北杏同蜜棗"

2012年7月22日星期日

葡點茶餐廳 @ 元朗

"葡點茶餐廳"
係元朗體育館側邊原身都係一間餐廳不過好似上年轉左手
而家主打係"葡國菜式"

新裝靚左同光猛左好多有個似燒臘檔既位置但係唔係賣燒臘

未入去之前諗住係普通茶餐廳 ................原來價錢比一般茶餐廳貴d

呢兩款標榜係招牌菜真係好想試下個乳豬飯不過呢....................
"人家大少"話試左d譜通野先啦如果好食下次先再試啵

係三心兩意之下我地就揀左呢兩樣啦

先黎係"人家大少"既常餐C 豬扒+牛腸豬仔包
笨笨試左一啖腸仔冇特別亦食唔出係牛肉腸再望下塊豬扒笨笨覺得......
又乾又油擺明係炸過龍仲要冇隔油 NO啦~ 至於個包 "人家大少"佢只係
一句 "OK啦" 哦~ 收到 !O!

再黎"什菌蝦湯意粉" 呢個就大件事啦>.< "人家大少"食左幾啖就成碟放低
佢話個湯好腥好難食 O...... 咁我就試一啖啦笨笨認為呢個意粉又唔係太難食既
(個人口味啦唔係難食但又唔可以叫好食囉哈哈^^) 結果 .....都係係半場交換食

常餐C 有凍飲一杯+2蚊雞

好啦到笨笨架啦 "咖喱牛肋腩" 佢有飯同"豬包"揀我揀左"豬包"點汁汁食
意料之外葡國唔係應該"椰汁味"重既咩? 我覺得佢既味道同普通咖哩分
別唔大只係帶甜多DD囉~ 牛肋入味同腍而牛腩就較硬左D

配上餐送既"豬包"

結論: LUNCH價錢黎講笨笨覺得可以接受但係食物既質素呢同大家X
大X活比既話就同級囉 HAHA~ "人家大少"話一定冇下次但係笨笨
就覺得可以試多次囉 ....................................拿拿拿.......................
呢D咪就係"個人口味不同囉 Wakakakkaka"

2012年7月18日星期三

蔥菜蒸馬友 & 豆角炒牛肉

早兩日搭小巴聽到一段對話 .......其實呢..... 我真係無意聽到架乍

佢地坐係我前面但係你地知架啦小巴有幾大丫 ....................

媽媽: 你個衰仔你幾時先可以比d心機讀書考試考好d呀

仔仔: 咁你幾時可以賭小d馬打小d麻雀咁我咪努力d讀書囉

笨笨: (sorry 我個時真係"ki"一聲笑左出黎)

個時媽媽既反應即時"o咀"無言 (rolling on the floor)

而家d小朋友真係童言無忌呀乜野認為自已係冇錯既都可以

放膽講出黎哈哈!! 如果係笨笨細個個時講d咁既野一定有外賣吃呀....

wakakkaka仲唔即時食個"紅燒一把掌" 返屋企仲有餸加"籐條炆豬肉" (devil)

"蔥菜蒸馬友"
馬友制成咸魚之後就真係食得多不過新鮮既呢真係第一次食
肉地係滑不過d肉好散魚味麻麻冇下次啦~ 變成咸魚既話好食好多呢~
新鮮既要6蚊一兩呢舊買左三十四蚊 (sad)

"豆角炒牛肉"
放心呢餐係未比"牛肉嫂"昆之前煮既所以牛肉既價錢同質素都冇問題
20蚊牛肉 5蚊豆角

2012年7月15日星期日

豉汁雞球 & 雲腿津白 + 花旗參螺頭豬展湯

笨笨基本上呻完就矛樹架啦哈哈!!

不過牛肉果個問題呢好多blog友都話叫我唔好幫襯呢檔野

但係........ 係我買餸呢個街市範圍之內就係得呢檔既品質靠得住d......

唉............. 不過唔緊要啦~ 呢排至多唔食牛肉等我.............

老大痴呆發作囉哈哈!! 好快會忘記架啦~

至於個位"公主同事" 佢第二日就被請吃"豉椒炒魷"

我而家返緊呢份工只係一間小公司同事+老闆 10隻手指數得晒

什麼守則要講基本上做好自己責任唔好比人投訴唔好煩到老細

老細都唔多理你架啦可能呢位"公主" 之前返既工仲嘆過係自己屋企啦~

(莫明其秒咁點解仲要搵野做呢?)

佢走個時返入黎拎返個"耳機" 仲攪笑......... 佢居然同我講

呢d乜野工黎架係人做架? 仲要係d咁既地方想請d乜野人呀?

笨笨只係傻傻咁笑一下冇答佢 (因為我真係唔知講乜好 ~_~lll)

"豉汁雞球"
每個星期我都會醃定一d凍肉放係冰箱預備不時之須有時趕唔切買餸
咁就隨時都可以拎黎用呢~ 呢次煎香佢再放豉汁 15分鐘攪惦晒~
豉汁笨笨一向都要"自家制" 因為用現成既點都係會有防腐劑
而且味道方面可以自己調一下 ^o^

"雲腿津白"
其實呢個唔係津白只係娃娃菜呢哈哈!! 笨笨較小煮呢個菜
因為笨笨有濕疹底而且............... 又唔戒口所以好多濕熱既野
都比較盡量小煮小煮jar 唔係唔食間唔中食下都ok既

呢排燥燥地飲返個湯下下火加埋螺頭同豬展 yummy~

2012年7月10日星期二

梅菜肉餅 & 什豆炒蝦仁

激死我啦激死我啦

頭先買餸又比人呃我錢啦 (angry)

點解而家d人咁衰架小小錢都呃人呢次仲要係幫襯熟既牛肉檔

本身我係搵開另一位靚姐幫我既點知佢行開左去買野

咁我見都幫襯左咁多次照計唔會出事架點點不知 >"<

比佢亞嫂昆左我10個大洋呀而家d野都貴到飛起架啦仲要比人昆多10個大洋

嬲到我呢本黎諗住買完牛腩就去買野煲湯既結果...................................

嬲到我買完牛腩就哭喪咁走左 (crying)

人家明明今朝開條"紅衫魚"食早餐架麻

銀包係得返4張20蚊跟本冇10蚊紙既.......... 我買30蚊牛腩比兩張20蚊佢

點知佢居然話我比30蚊我同佢講咁熟我點會呃你呀咁多年都係幫襯你地

佢居然拉開個櫃"3秒" 叫我自己睇下睇乜春呀唔係10蚊就係20蚊50/100呢d

唔通我報警驗指紋呀 (angry)

....................嬲死我啦嬲死我啦 (crying)

冇晒mood啦唉~

我知道架啦以後都唔理佢地熟定唔熟比錢個時一定要同佢講 .................

靚仔/姐 (再將自己比佢多錢佢講出黎等佢自己都打醒精神睇清楚)

呢次真係好滾各位會去"合益"買餸既blog友仔去呢檔牛肉檔買野打醒精神呀
(街市燒臘店側邊個檔牛肉檔個位亞嫂係較肥/矮中年40左右.....)

"梅菜蒸肉餅"
講起梅菜唔知大家有冇用開"石澳梅菜"呢 ..... 早排係"家興"見到佢價錢好抵買呀
不過笨笨未試過係家興買過唔知會唔會有唔同?

"什豆炒蝦仁"
呢個係笨笨成日都會整既野呢次見到屋企d乾蔥都擺左好耐啦
快d用埋佢先咁就加d乾蔥去爆香一齊炒又唔錯啵

2012年7月6日星期五

南乳炆豬手 & 蒜容菠菜

早排講起"教新人" 好似都唔夠一個月又有另一新人例子

話說早幾日黎左位80後的新同事通常頭一兩日都唔會有乜特別野比新同事做

咁就比左一個A4盒佢叫佢幫手對下入面既數睇下有冇入錯同入漏

個盒野唔滿大約A4盒3/4份量左右啦入面係2011-2012既資料

係上會計師樓埋數用既順帶同佢講對數個時留意下公司既客戶名啦~

都冇諗住佢會係一兩日內攪惦就同佢講 10月先上會計師樓既

你可以慢慢做架有問題就問啦 ..................點知.....

放低左唔夠10分鐘佢就過黎同我講我唔識對 @o@

笨笨: 點唔識對呀入面有"總帳" 每個月既單都file起你一個一個月咁對囉

同事: 我唔知係乜唔識對

笨笨: 邊方面睇唔明呀?

同事: 樣樣都唔知唔明係乜仲有咁多點對呀你地請我返黎係做文員架唔係對數架
你唔好將你既工作叫我幫你做啦

笨笨: (呆左即時O咀) 咁請你個時有同你講要入帳架麻你知唔知乜野係入帳呀?

同事: 我知丫入帳咪即係有單就入落電腦囉你當我係細路女呀你冇X蝦我呀

笨笨: (更加呆左+無奈+=_=llll 心諗唔係呀粗口都要講埋雖然呢間唔係什麼高檔公司
但係點解我會遇到呢d人既跟住就見佢係到上youtube 上tvb 仲拎埋耳機出黎聽)

死未 >_< 第一日就咁乜野人黎架 !!

"南乳豬手"
行完山發現自己更加老左好多對腳即時痛呢 >"< 要保返d腳骨力先哈哈!!

呢隻豬手盛惠43大洋 >o<